Intaunt cha tschertüns cuorran darcho zieva la culla da chüram, vaun oters culs skis a chatscha da medaglias e d'onur. Fotografia: Jon Duschletta

Bella quista!

Che impertinenza! Uossa, pochas uras aunz cha San Murezzan as vess pudieu preschanter cun sieu champiunedi mundiel da skis a tuot il muond, haun quels barbots da ballapeists tuottüna stuvieu cumanzer culla seguonda part da lur maestraunza - bella quista! Bun, eau admet, üna grand concurrenza pel evenimaint da skis nu saron ils kickers da la Raiffeisen Super League. «Grazcha» nempe al club da ballapè da Basilea es quella maestraunza uschè excitanta scu üna visita i'l parc dals uors a Berna düraunt l'inviern. Cò nu güda neir il nom internaziunel üna bella pipa. Vzains ün uors, u dorman quels auncha? Cun quaunts puncts avantag guadagnan quels da Basilea «lur» champiunedi? Che lungurella!

Las dumandas propi importantas da las prosmas duos eivnas sun tuottafat otras: Guadagna la Lara üna o püssas cuorsas da las disciplinas sveltas, forsa dafatta quella rapida, la cuorsa da las cuorsas? Quauntas voutas insomma po intuner il cor da scolars da l'Academia Engiadina da Samedan l'imna Svizra düraunt las ceremonias da medaglias i'l parc dal Kulm a San Murezzan? Funcziuna il concept da trafic eir düraunt las fin d'eivna cur cha tuot il muond voul visiter la regiun? Es la lingua rumauntscha uschè preschainta scu giavüscho düraunt las maestraunzas? Tegna l'ora? Che mê tuot metta ella suotsur, la nouva s-chellera americauna ils prossems dis? Chat eau i'l vocabulari tudas-ch-rumauntsch, chi’d es integro in l'app da la pagina ufficiela dals champiunedis da skis www.stmoritz2017.ch, il pled chi am mauncha propi uossa per cuntinuer quist blog e per spiegher, che cha quella pizcheda politica ho pers cò? Zist ed ünguotta, nempe.

Quist blog vain sport in collavuraziun traunter la Lia Rumantscha e l'«Engadiner Post/Posta Ladina». El as dess accumpagner cò e da quinderinvi, di per di düraunt tuot il champiunedi, e pussibilter ün sguard alternativ sün e davous las culissas da quist mega-event sportiv. Ma chi so, scha que vain a funcziuner? La lezcha da scriver quistas lingias nun ho nempe surpiglio ün cumpetent fan da sport da skis, dimpersè ün, chi nun ho la minima ideja da la chosa e chi conguela (almain fin hoz) la tensiun d'üna cuorsa da skis cun ün gö da ballapè traunter Basilea e Thun. Auà! I'l sen d'ün servezzan public nu glivra il blog dal di neir brich cun üna frasa scorta finelissima opür cun üna conclusiun cumpetenta, dimpersè cun ün sguard sül di e sün que chi capita düraunt il di a reguard la lingua rumauntscha ed evenimaints da culurit indigen. In quel sen saja rendieu attent al cult divin ecumenic d'avertüra cul tema «glüsch e temporalited» chi ho lö quista saira a las 17.00 illa baselgia refurmeda a San Murezzan cumün. Dimena: Via al champiunedi e buna furtüna!

Jon Duschletta

 

Quist blog vain sport in collavuraziun traunter la Lia Rumantscha e l'«Engadiner Post/Posta Ladina». El as dess accumpagner cò e da quinderinvi, di per di düraunt tuot il champiunedi, e pussibilter ün sguard alternativ sün e davous las culissas da quist mega-event sportiv.

 

Die Kommentarfunktion ist für diesen Artikel deaktiviert.

0 Kommentare