Ils sachins da zücher da Daniel Badilatti cul skiunz disegno da Pia Valär. Fotografia: Jon Duschletta

L'illustratura ed il brastulin

Che mê haun da cumünaivel, la giuvna artista Pia Valär chi viva e lavura a Turich, e Daniel Badilatti, l'importeder e brastulin da cafè? Bger, que pudais am crajer. Per prüma sun els tuots duos Zuozinghers, profis in lur misters e buochas finas. E, per seguonda, - e chi vess que penso - eir grands amatuors da cafè. Quista bavranda choda e naira, oriunda da la regiun Kaffa i'l südvest da l'Etiopia, quist liquid mistic, quist stimulant da corp ed orma e chi ho influenza sün bgera poesia.

Valär e Badilatti haun però auncha ün'otra colliaziun. Grazcha a la Lia Rumantscha sun els nempe eir preschaints al champiunedi da skis a San Murezzan cun ün pitschen ma prezius prodot, ün sachin da zücher. «Piglia‘t il temp» sto scrit sün quel e da vzair es ün skiunz in sieu dress cotschen chi tschainta tuot pachific süsom il podest ed as cuescha lo üna tazza da cafè. Fo'l sia posina aunz cu ir a la partenza da la cuorsa per survgnir auncha üna doscha da cofeïn, forsa dafatta quella decisiva pella victoria? Eau pens da bain! Otramaing vess el fingià intuorn culöz quel ardöffel d'üna medaglia d'or. Tuot a sieu temp. Sgür ch'el baiva üna tazza dal «St. Moritz Café», üna specialited da cafè Arabica dal brastulin Badilatti e sia brassaria da cafè la pü ota da l‘Europa, nair e cun ün mez sachin zücher. Que füss alura eir güsta il möd predilet da baiver il cafè da Pia Valär. La disegnadura da «Traideschin», «Gian Plaiv» ed otras figüras marcantas lavura scu illustratura libra. Ella ho disegno quel skiunz tschantand sül podest ed impü duos ulteriuras scenas dedichedas al champiunedi mundiel. Duos skiunzs sül sez da la s-chabellera chi perseguiteschan davent da lur trun la cuorsa dal slalom gigant suot els. Ed eir la scena da marenda d'ün quartet da skiunzs - probabel visitaduors d'üna u l'otra cuorsa dal champiunedi - chi giodan ün bel baccun, üna tazza cafè ed ün bun magölin cotschen, deriva da la penna da Pia Valär.

Intaunt cha Daniel Badilatti ho baja, cha sieus sachins da zücher rumauntschs daun andit a discussiuns e güdan uschè a sensibiliser pella quarta lingua, tradescha sia barista, Diana Bassin, i'l Caferama a Zuoz adascus, cha'l schef nun hegia dimena be quel ün ed unic möd predilet da giodair sieu cafè. Cu na? Ch‘el baiva tuot tenor vöglia ed urari quista u l'otra specialited da la chesa, es la resposta pragmatica. Nus crajains e gnins a la fin. Ün viva al cafè «rumauntsch», nair e dutsch, buna furtüna al skiunz cul numer 90 e grazcha, Pia, pellas cartulinas illustredas, chi sgüra chattan davent da San Murezzan la via in tuot il muond. 

Eau per mia part baiv il cafè gugent nair ed in duos pitschens süervs. Adonta cha, am permettè auncha ün ultim pled in fuorma d'ün proverbi arab: «Il cafè stu esser bugliaint scu'ls bütschs d'üna matta il prüm di, dutsch scu las nots in sia bratscha e nair scu'l blastmöz da sia mamma, cur ch'ella vain a savair.»
A San Murezzan ho lö quista saira a las 18.00 (avertüra da las portas a las 16.00) la granda festa d'avertüra dals 44evels champiunedis mundiels da skis. Bun cha cumainzan finelmaing, quists dis.

Jon Duschletta

 

Quist blog vain sport in collavuraziun traunter la Lia Rumantscha e l'«Engadiner Post/Posta Ladina». El as dess accumpagner cò e da quinderinvi, di per di düraunt tuot il champiunedi, e pussibilter ün sguard alternativ sün e davous las culissas da quist mega-event sportiv.

 

Die Kommentarfunktion ist für diesen Artikel deaktiviert.

0 Kommentare