A pera cha‘l mardi saja sto il di dals inscunters: quels traunter da Voluntaris… Fotografia: Jon Duschletta

Inscunters chi uneschan

Che armonia! Lara Gut parta scu favurita illa cuorsa dal Super G e vain a la fin be terza. Ups! Ma üngün nu sto sü, tschüvla agüz, do dals mauns e schmaladescha a quellas duos curriduras chi sun stedas pü sveltas cu Lara. Dafatta pü tard, giò i'l minz dal cumün e zieva ün pêr bieras nu sfrattama üngün cul puogn sün maisa e clama grittanto, cha'l treneder da Lara nu vela üna pipa tabac e stopcha gnir tramiss immediatamaing in quel pajais. Ed uossa guardè quista: La banda da musica austriaca da Leutasch fo grand travasch sülla Plazza Maurizius, balla la Polonaise e gratulescha sün ün grand transparent a la vandschedra da la cuorsa, a Nicole Schmidhofer. E che faun ils supporters da las otras naziuns? Els as ferman, taidlan tiers, ballan ed applaudeschan. Scenas, bod scu zieva ün gö da ballapè, nischi?

Ils champiunedis mundiels da skis a San Murezzan uneschan in ün möd fich paschaivel. Que es, almain fin cò, evidaint. Els uneschan il pêrin da Voluntaris chi chamina maun in maun traunter la glieud, els uneschan ils viagiatuors i‘ls mezs publics chi discuorran ün cun l'oter invezza da giuver minchün per se svess cul telefonin, ed els uneschan eir la Kenia e la Steiermark in Austria. Cu que? Dimena, l'ultim exaimpel ho da chefer culla skiunza Sabrina Wanjiku Simader. Ella cumplescha in avrigl 19 ans ed es steda her a San Murezzan la prüma atleta keniana chi insomma es partida a champiunedis mundiels da skis – ed es riveda al böt. Sia relaziun cul sport da skis dvainta ün pô pü clera, scha’s so, ch'ella sto illa Steiermark. Uschè sun eir d'incler tuot quellas binderas kenianas ed austriacas chi l‘haun accumpagneda a San Murezzan.

Inscunters ho que her eir do traunter 24 iffaunts da la tschinch- e sesevla classa da Müstair ed Adolf «Dölf» Ogi. Scu president da sia fundaziun «Freude herrscht» ho invido Ogi a las scolaras ed als scolars cun lur magisters per ün di a San Murezzan als champiunedis mundiels da skis. Inclus il viedi, la plazza sülla tribüna, marenda sül lö, tschaina i'l restorant Uors a Zernez e - natürelmaing - l'inscunter persunel. «La giuventüna», ho dit Ogi sü Salastrains, «es a la fin finela l’avegnir da nus tuots». La fundaziun exista in algordanza da Mathias Adolf Ogi, il figl cha Ogi ho pers dal 2009. Guardo uschè, ho il sport da skis unieu her per ün cuort mumaint eir la vita culla mort.        

Hoz faun ils homens la cuorsa dal Super G ed our da vista culturela rumauntscha concertescha il Cor Masdo da Puntraschigna a las 19.00 illa zona da peduns.

Jon Duschletta

 

Quist blog vain sport in collavuraziun traunter la Lia Rumantscha e l'«Engadiner Post/Posta Ladina». El as dess accumpagner cò e da quinderinvi, di per di düraunt tuot il champiunedi, e pussibilter ün sguard alternativ sün e davous las culissas da quist mega-event sportiv.

 

Die Kommentarfunktion ist für diesen Artikel deaktiviert.

0 Kommentare