Ils schurnalists da sport sun üna spezcha da glieud per se e peran – a l'incuntrari da l'autur dal blog – da lavurer bain e gugent illa fuolla. Fotografia: Jon Duschletta

Immez la fuolla

Che travasch! Lavurer cun buna peida lo, inua cha la creativited at bütscha – que es la devisa dal muvimaint miaEngiadina per promouver l'uschè numno «prüm terz lö». L’intent dimena, da creer l'infrastructura perfetta per gnir in Engiadina a lavurer. Cò, immez la natüra, relaxo, motivo e collio cul rest dal muond tres la fibra da vaider svelta. Que circumscriva, illa quintessenza d'ün chi stu auncha lavurer üna dunzaina dad ans, l'expressiun «qualited da vita» perfettamaing. Güsta trais da quists lös da lavur perfets existan düraunt ils champiunedis mundiels da skis eir a San Murezzan. Que es il «Main Media Center» i‘l Hotel Reine Victoria giò'l Bagn, ed il bod uschè important «Sub Media Center», sü Salastrains, in vicinanza dal böt da las cuorsas. Lo do que dafatta duos locals per lavurer e lo haun eir lö las prümas conferenzas da pressa, güsta zieva las cuorsas. «So weit so gut», dschess il reporter da lingua tudas-cha e scrivess inavaunt sias lingias grassas – quellas cha vus avais let hoz cun baiver il prüm cafè.

Aunz cu ler inavaunt stuvais vus però simplamaing auncha savair üna chosa: l'autur da quistas lingias es il tip «miaEngiadina», voul dir, ün chi lavura il pü bain, concentro ed efficiaint a chesa. Sulet culs impissamaints, culla tastatura platta e seguind culs ögls a quel strichin nair, numno curser. Ün tip dimena, chi già i‘l «Main Media Office» da la «Posta Ladina» a San Murezzan ho difficulteds da’s concentrer sün l'istorgia ch'el vuless gugent scriver, scha duos collavuratuors discuorran ün cun l'oter ed ün oter telefona cun chi so chi. E quist tip tschainta hoz sü Salastrains, immez la fuolla dad arduond 250 schurnalists illa sela granda dal «Sub Media Center». 100 oters collegas haun lö illa sela pitschna be daspera ed auncha 470 ulteriuras plazzas da lavur sun installedas i'l – vus suppuonis güst – «Main Media Center». Ma che voul que dir plazzas da lavur? Que basta da s‘imaginer üna festa da musica in üna tenda stichida per as pudair imaginer la situaziun da quista gianella gigantesca. Dadains in ün meter da radius ils duos schurnis visavi chi discuorran frances, ella, tschanteda illa diagonela, discuorra inglais, e quels duos culla granda camera a dretta, haun ün accent austriac. «Mier san vum esterreichischen Foarbfernsehn», disch quel sainza camera aunz ch'el dumanda qualchosa furber a la vandschedra da la cumbinaziun alpina, a Wendy Holdener.

Intuorn ed intuorn vain que scrit mordio, fat fotografias a tanfun e tramiss tuot insembel immediatamaing intuorn il globus. A vain telefono, discurrieu, sto sü e partieu, arrivo ed as tschanto. Sün quasi mincha maisa ün computerin, ün telefonin «sowieso», apparats da fotografer, cabels, adapters, chargia-battarias, palperi e giazettas. E davaunt sül podium il moderatur baderlunz chi bivgnainta las prümas trais da la cuorsa e fo intervistas in tudas-ch ed inglais cun ellas. «So weit so gut» ho dit l'autur, ho fat fagot, stüz sieu notebook, ho piglio cumgio in silenzi ed ho scrit a fin quist blog a chesa.

Hoz sanda cumbattan ils homens illa disciplina da raig, la cuorsa rapida. La Patrouille Suisse svoula a las 11.00 ed il Oberengadiner Jodelchörli tegna cunter a las 16.00 illa zona da peduns. Lo vain preschanto a las 17.00 eir il teater DRAUFFischem ed a las 19.00 faun lo ils «Prefix» lur rock.

Jon Duschletta

 

Quist blog vain sport in collavuraziun traunter la Lia Rumantscha e l'«Engadiner Post/Posta Ladina». El as dess accumpagner cò e da quinderinvi, di per di düraunt tuot il champiunedi, e pussibilter ün sguard alternativ sün e davous las culissas da quist mega-event sportiv.

 

Die Kommentarfunktion ist für diesen Artikel deaktiviert.

0 Kommentare