Lise-Marie Morerod ho guadagno dal 1974 bruonz i'l slalom als champiunedis mundiels a San Murezzan, 1975 a Garmisch-Partenkirchen sia prüma cuorsa illa coppa mundiela ed es gnida quarta 1976 i'l slalom gigantesc dals gös olimpics a Puntina. Cò düraunt üna visita a San Murezzan. Data incuntschainta. Fotografia: Jon Duschletta

1974 - "D'Lisemarie und i"

Che sentimaints! Da quist temp, aunz 43 ans, d'eiran güst glivros ils 23evels champiunedis mundiels da skis ed ils prüms cha San Murezzan ho organiso (zieva duos gös olimpics d'inviern). Ün'eivna, och disciplinas e grands noms sül podest: Klammer, Frommelt, Thöni, Gros, Hinterseer, Zwilling, Ochoa, Moser-Pröll, Serrat, Treichl, Wenzel e – üna giuvna Vadaisa da be güsta 17 ans, cun chavlüra brüna ed ün rir tmüchin – la Lise-Marie Morerod. Na be ch'ella es riveda quel venderdi, ils 8 favrer, da maniera surprendenta terza i'l slalom ed ho guadagno cun que l'unica medaglia pella Svizra, na, Lise-Marie ho impü miss suotsur dandet e per adüna il muond d'ün giuven indigen da desch ans. Cha'ls Tudas-chs haun guadagno quel an il champiunedi da ballapè a München, cha'l grand Ali ho miss k.o. a l'oter grand Foreman düraunt il cumbat legendar «Rumble in the Jungle» a Kinshasa in Zaïre u la scuvierta da l'armeda da terracotta i'l mausoleum da l‘imperatur Qin – tuot bagatellas in confrunt cun que chi’d es capito in quel mumaint cul giuvnot. Quista duonna, chi paraiva quella vouta sest tü quaunt creschida, (in vardet d'eir'la be set ans pü veglia) s'ho fixeda i'l cho dal giuvnot e probabel eir güsta furmo lo l‘uschedit «purtret da duonna». Duos ans pü tard haun alura Hanery Amman e Polo Hofer dals «Rumpelstilz» transfurmo quels impissamaints dal scolar primar da San Murezzan illa chanzun «D'Rosmarie und i» e gieu cun quella ün grand hit. Ma que füss'la dal sgür eir dvanteda, sch'ella vess purto il titel «D'Lisemarie und i».

Schi, schi, l'an 1974. Las algordanzas dal giuvnot als champiunedis mundiels sun hoz be auncha tuorbels. Da qualche vart varo'l güdo a servir schoppa u forsa eir controllo üna porta d'üna cuorsa, chi so, zieva taunts ans? Ils sentimaints dal giuvnot as giraivan inamöd be auncha intuorn Lise-Marie, las conscolaras chi cumanzaivan a gnir interessantas opür l'effet cha'l prüm bütsch da Corina i'l murütsch da la Laudinella ho fat… 1974 ed ils ans seguaints sun però eir stos il temp, cha’s mangiaiva la sanda a mezdi ils spaghets in stüva e cha‘s guardaiva las cuorsas da skis i'l ravuogl da la famiglia. Ils temps cha'l giuvnot tgnaiva ils poleschs per Lise-Marie Morerod, Roland Collombin (quel mez nar) e l'oter, ah, cu ho‘l già darcho nom? Cumainza cun R…..? – Listess. Confirmo es però, cha'l giuvnot ho pers l'interess pel sport da skis alpin güsta in quel temp, cur cha Collombin e pü tard eir la Morerod haun stuvieu glivrer lur carrieras sportivas pervi da greivs accidaints. Uschè, mieus chers, funcziun'la, la vita.  

Hoz dumengia cumbattan las duonnas per l'or illa cuorsa rapida a las 11:15 ed ils hommens a las 13:30 – scha l’ora voul. Illa zona da peduns suna a las 16.00 l'Alphorn Ensemble Engiadina sias tübas ed a las 17.00 e las 19.00 concerteschan lo ils «Rebels».

Ün pêr bellas impreschiuns dals champiunedis mundiels dal 1974 do que da vzair suot: blog.tagesanzeiger.ch/zoom/index.php/85209/ski-wm-1974/

Jon Duschletta

 

Quist blog vain sport in collavuraziun traunter la Lia Rumantscha e l'«Engadiner Post/Posta Ladina». El as dess accumpagner cò e da quinderinvi, di per di düraunt tuot il champiunedi, e pussibilter ün sguard alternativ sün e davous las culissas da quist mega-event sportiv.

 

Die Kommentarfunktion ist für diesen Artikel deaktiviert.

0 Kommentare